Feeds:
ჩანაწერები
კომენტარები

Archive for სექტემბერი 25th, 2011

ჩემი ველოსიპედი

წეღან “ფეისბუქის” ერთ კარგ ჯგუფში წავიწუწუნე, რა მრჯიდა, წინა პოსტს შუაღამისას რომ ვწერდი-მეთქი, თითქოს არ ვიცოდი, კვირის პოსტი რომ დასაწერი მქონდა. არადა, ისიც კვირის გამოდის. ეჰ, ზარმაცი სტუდენტივით მომდის, ბოლოსკენ რომ გადაინახავს სამეცადინოს და გამოცდის წინ რომელ წიგნს ეტაკოს,  რომ აღარ იცის. ისე, სამეცადინო მართლა ბევრი მაქვს და რეჟიმის გაუმჯობესება და დახვეწა მომიწევს. ამაზე შემდეგ…

ჩემი ველოსიპედით ყველას თავი მოვაბეზრე უკვე, მაგრამ თქვენ ვერ წარმოიდგენთ, რა კარგი რამაა ეს. ტყუილად კი არ დამირქმევია სახელი.

თემატური სურათისთვის მადლობა გრინმარს

დილით ადრე ადგომა ყოველთვის ძალიან მიჭირს, რადგან დილის ძილზე მეტად მხოლოდ ტკბილეულობა მიყვარს. მას შემდეგ კი, რაც ვიცი, რომ ქვემოთ ჩემი რაში მელოდება, მალევე წამოვხტები ხოლმე.

უმეტესწილად დილით ადრე მიწევს გასვლა და თუ კარგი ამინდია, ჯერჯერობით კი აქ კარგი ამინდებია, სახეში ამომავალი მზის შუქი მირტყამს, ხოლო ახალგაკრეჭილი გაზონებიდან მოთიბული ბალახის სუნი მცემს. თავისუფალ გზაზე თუ ვმოძრაობ, ყურსასმენებსაც ვიკეთებ და პედლებს მუსიკის რიტმში ვატრიალებ. ცოტა სიფრთხილე მაინც საჭიროა, შეიძლება გზად ბენტერა იხვი ან თოლია გადაგეყაროს და გვერდის აქცევა ვერ მოიფიქროს. გზად ხიდი მაქვს გადასავლელი, დასაწყისში აღმართია და ოდნავ ვიღლები, სამაგიეროდ, ხიდის მეორე ნახევრის გასავლელად მხოლოდ დაღლილი ფეხების მოდუნება და ინერციით დაშვებაა საჭირო, იქვე პატარა მოხვევა და დავეშვით… ამის შემდეგ უკვე იდეალურად სწორი ბილიკია, რომლის უდიდესი ნაწილი ხეივანში გადის. თუ წინ არავინაა, თავის უკან გადაწევა და ხეებისა და მათ შორის ცის ნაგლეჯის ყურებაც შეიძლება, სახეში გრილი ჰაერი მხვდება, მაგრამ მცხელა.

უნივერსიტეტამდე კიდევ ერთი მოსახვევია, რომელიც ხანდახან გამომრჩება ხოლმე, თუკი რამეზე ჩავფიქრდი, თუმცა, ეს დიდად მნიშვნელოვანი არცაა, სხვა გზით მივალ. ერთი ეგაა, იმ ხმას ვეღარ მოვისმენ, ჩემი ველოსიპედის უკანა თვალი მოსახვევში რომ ოდნავ გამოსცემს და მსიამოვნებს. უნივერსიტეტის ეზოში სვლას ვანელებ, შემდეგ კი თავისუფალ ადგილს ვეძებ და ჩემს რაშს საიმედოდ ვაბამ.  საკეტის ჩატკაცუნების ხმა, შემდეგ შესამოწმებლად მოქაჩვა და უკვე შემიძლია, აუდიტორიაში შევიდე.

ჰო, მართლა, ჯინჯერს ჩამკეტიც თავისივე ფერის ვუყიდე, უხდება…

 

Read Full Post »